"Мянтуз сярод мядуз" — не проста кніга скорагаворак. У азбуцы-маляванцы маленькі чытач пазнаёміцца з усімі літарамі беларускага алфавіта. Гэта па-першае. А па-другое, навучыцца правільна вымаўляць іх. Па-трэцяе, даведаецца, якія ёсць рыбы. А ўзяўшы ў рукі каляровыя алоўкі ці фарбы, яшчэ і размалюе кніжку на свой густ. Мастачка Лаліта Мельнічэнка магла б зрабіць гэта і сама, аднак вырашыла даручыць дзецям. Не падвядзіце ж яе!

Чытанне вершаў, прысвечаных кожнай літары алфавіту, на дыску чаргуецца са спевамі. У дадатак да дыска ёсць друкаваны буклецік на 20 старонак, у якім прыгожа аздобленая вершаваная чытанка.

Вершы, казкі і байкі Алега Старынчыка адрасаваныя як дзецям, так і дарослым. Яны поўныя гумару, радасці і пяшчоты, любові да роднай зямлі, усяго навакольнага света. Гэта байкі пра нас саміх. Нават сатыра ў творах аўтара не крыўдзіць, бо яны напісаныя з вялікай павагай і дабрынёй.